,,სალომე ზურაბიშვილი დღეს ჩვეულებრივი ინსტრუმენტია სააკაშვილის ხელში”. ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტის კითხვის პასუხად განაცხადა.
„ასეთი რამ საქართველოს 30-წლიან ისტორიაში არავის არ გაუკეთებია. მიხეილ სააკაშვილსაც კი, რომელმაც დანაშაულები ჩაიდინა. მასაც კი, საჯაროდ, ღიად ფეხქვეშ არ გაუთელია საკონსტიტუციო სასამართლოს გადაწყვეტილება და საქართველოს კონსტიტუცია.
ამ სამწუხარო ჩიხში შეჰყავს მას საქართველოს სახელმწიფო მოწყობა, ეს არის პირდაპირი მტრობა ქართული სახელმწიფოს, როდესაც კონსტიტუციური ორგანოს წარმომადგენელი გააზრებულად არღვევს კონსტიტუციას. თუმცა ეს გასაკვირი არ არის, ის ამ პოზიციას მხოლოდ „ნაციონალური მოძრაობის“ წყალობით ინარჩუნებს. „ნაციონალურმა მოძრაობამ“ ჩაშალა იმპიჩმენტის პროცესი. მათი მიზანია მიხეილ სააკაშვილის ციხიდან დახსნა და სალომე ზურაბიშვილი მათთვის არის ინსტრუმენტი სააკაშვილის ციხიდან დახსნისთვის. სწორედ ეს არის მათი თანამშრომლობის მთავარი საფუძველი. ასე რომ დღეს სალომე ზურაბიშვილი მათ შორის ამ ღონისძიებებით, კონსტიტუციის ფეხქვეშ გათელვით არის ჩვეულებრივი ინსტრუმენტი სააკაშვილის ხელში“, – განაცხადა პაპუაშვილმა.
